吃晚飯時，焗魚塊端在女兒正前方。
媽咪伸手夾魚時——
女：媽咪，可唔可以幫我夾魚？
媽：仲細咩，仲要我幫你夾餸，ＢＢ嚟架？！
（說時，把大量魚肉送到她碗中）
女：咁點解你教我要夾餸比長輩？佢地BＢ嚟架？
2024年11月17日 星期日
2024年9月20日 星期五
月半
女：媽咪，我諗到我下年想要咩生日禮物喇！
媽：你啱啱過咗生日都未夠一個月，咁快諗定下年要咩？你下年八月先講啦，以你幾日就變一次......
女（打岔道）：咩八月啊？六月半啦......
媽（大笑打岔道)：咩叫六月半？六月中啊嘛。你而家講嘢用語咁古怪架！
2024年7月15日 星期一
石頭記
女：有個人幫一舊石頭改名，你估下叫咩名？
這是腦筋急轉彎題目嗎？
媽咪隨口說了個名字作回應：Ｍａｒｙ？
女：係Ｅｍｍａ。
媽：點解？
女：石頭嘛。
哦哦。
爹：我地個年代，佢叫Sｈａｒｏｎ。
媽咪心想：我腦海出現咗賈寶玉喎。
一塊石頭，述說著兩代人及中西不同的文化交流。
2024年5月27日 星期一
女兒的逆向思維
踏入初夏，有人早前嚷著要買新衫，因為舊的都已經太小了。
明明外面得十五六度，媽咪於家中仍得穿薄長袖衫時，有人已不下一次穿上新的夏裳。她為人奔放，全新的淺色上衣已於上次穿上時附送了點點餸汁，懷疑患有強迫症的媽咪點洗點漂都仍覺非常礙眼，但有人不以為然。
媽：你件新衫著到一躂躂，好核突。
女（望了望）：邊有啫，都睇唔到！
媽：D衫件件都著到咁污糟，以後買咩衫褲比你都揀黑色啦，我無咁眼冤。
女：到時你發現我倒瀉漂白水。
她這句話，媽咪用了兩三秒去思考和解讀。
這是不是傳說中的逆向思維？
其實她真的妙不可言！
 |
| 外面十五度咋喎，但有人已於家中穿短袖衫 |
2024年5月19日 星期日
是日金句
爹娘差不多每隔兩三星期，都會走到鄰近大公園去。
趁是日天氣大好，二人又相約往那裡走走去。至於女兒嘛，公園和植物顯然都吸引不到她，總是寧可待在家中。孩子大了，不愛黏著我們也是理所當然的。嗯嗯，也得想想我們家可能也很快便會變成「空巢家庭」了。我們亦提議下星期如果天氣好，可以往大公園野餐去，但她依然不為所動。
記得二月下旬那次到訪大公園後，令我們無法不愛上那裡：不期而遇的櫻花盛放真是個大驚喜。然後，每次到來，都總是看見不同景致：各色各樣的花草，都按自己的時間表來展示其美態，所以每次到訪都會看到新的風貌。四時之景不同，這可從沒有令我們失望過。
上次來時見紫藤含苞待放，今次固然特意走去看看她們盛放的風姿。一大片軟垂的粉紫吊絮，果然帶著震撼人心的驚艷，加上清風送來陣陣清幽香氣，太醉人了。
 |
| 要有這般長長花絮的，非日本或中國品種莫屬 |
 |
| 我們家肥肥圓圓頗有點像松果的花苞，則為美國品種 |
數今次最令人心動的，卻又非玫瑰莫屬：眼前一株株不同品種的玫瑰花叢，萬紫千紅又百媚千嬌，都是大自然的鬼斧神工，而且好些花都開得如巴掌般大，叫人嘖嘖稱奇。
 |
| 一朵朵盛放的花苞都比我手掌更大 |
 |
| 這朵花瓣密密麻麻的，色澤也太粉嫩了吧！ |
回到家，趁天氣好便又修修花園，給新盆栽換盆、修枝、除雜草與害蟲這些，工作奇多，時間很不夠用。午後花園的太陽正猛，才動了幾動便汗流浹背。流汗這回事嘛，真的有點久違但太舒爽了，而且打理花園總是令人心情暢快。
只是，天氣悶熱加上不斷勞動，體溫一下子升高了，身體便以汗水調節著。豆大的汗珠一滴滴滑下，整個人很快便感到有點缺水了，只好走回室內去。
我們習慣走出花園時會換上另一雙鞋子，以免把泥沙帶入室內。才進回廚房，只見原本那雙拖鞋如今只剩下一隻，孤苦地佇候在玻璃門前。
奇也怪哉，明明把一雙鞋子除下再換上另一雙的，如今只剩一隻不是太不合理嗎？剛才有不慎踢到嗎？便試試四處找找看，廚房其實不大，也沒有太多隱閉處。
爹哋說：係咪阿女著咗你一隻鞋呀？
媽咪覺得太不合理了，回應道：點會著一隻走啊？
然後，他以餅乾「利誘」這小怪獸下來吃茶點。半晌，有人穿了我一隻拖鞋，單腳跳著過來。
吓，真係有人會著一隻鞋走？！爹哋倒也太了解這孩子了。
問她這是怎麼了？
戲肉來了～
「我有諗過架，我著咗一隻而你又可以著另一隻，大家有得分享，唔係好好咩？」金句王回應道。
到底我聽咗Ｄ乜？這又是甚麼歪理？！
這孩子的思路太不尋常，總是令人難以猜透。不過，就是因為跳脫，所以往往亦可以令原本應該尋常不過的事，變得滿有火花與趣味。（當然，令人火光的時候亦不會少！）
同場收錄：孩子是日下午為我做的ａｌｌｉｇａｔｏｒ ｂｕｒｇｅｒ，亦體現了她非一般的想像力。
 |
| 小脆瓜倒真有點像鱷魚尾巴吧 |
2024年4月12日 星期五
2024年4月11日 星期四
手機相片
已經不只一次，女兒衝著我的花花草草來吵鬧。
女：媽咪，點解你電話呢個ｐｒｉｆｉｌｅ ｐｉｃ唔再用我D相，而轉咗係你D花？
媽：你細個先得意，而家一叫你影相就黑面。都無靚相，點用你啊！你睇Ｄ花開得幾靚。
女：我唔理，你快Ｄ轉返做我既相！
媽：冇轉晒架，有Ｄ都保留咗係你。你睇，呢張你以前細個幾得意。
女：唔得，要轉返其他。
（她將來肯定是霸道女友）
見有人不肯罷休，媽咪打開手機相薄，開了其中一張她最樣衰的相片來，說：咁用呢張啦！
然後，彼此嘻哈大笑、搶奪之中作結。
2024年4月10日 星期三
心底強大
女兒是日首次邀請好友來ｓｌｅｅｐｏｖｅｒ，原本她不知道對方先會與一位港女到另一位港女家住宿，即那三人會先一起食、住、玩後，好友才轉場過來宿一宵。
起初知道她們先有聚會而沒有預我們家孩子份兒時，都深怕有人會感到被忽略，所以選擇向女兒「提早引爆」，便問她：原來佢地之前一日會一齊玩咗先，但無預到你，你會唔會唔開心？
她說：咁人地第一次邀請朋友來過夜，點招呼咁多人啊？唔通叫晒五、六個去咩，而且佢地三個最ｆｒｉｅｎｄ。
她似乎認為事情很合理，而且也像領略到所謂「親疏有別」，畢竟人與人之間相處，不可能對每人都一樣親密投緣。
厚多士媽咪怕她仍未說出真心話，試探道：你無ｈａｒｄ ｆｅｅｌｉｎｇ嘛？
她看得很開的說：咁人地唔預我，我都無辦法啦，而且之後佢都黎我度玩，有乜所謂！
透過這件事，才感到這孩子的心理超強大，被媽咪小覷了。
2024年4月6日 星期六
花草世界
下午：
女：媽咪，我ｓｅｎｄ咗條片比你，你睇下。。。
媽：有棵花我要剪一剪先。
女：都話你鍾意植物多過我啦。
媽咪笑但不語。
黃昏：
女：媽咪，如果世界忽然發生咗一Ｄ事，你只可以救一樣野，咁你揀我定你Ｄ植物？
媽：傻女黎既，梗係。。。
女：梗係你Ｄ植物丫嘛。
媽（大笑）：傻豬，咁多棵我救得邊棵？
女：即係如果得一棵，你就揀佢唔揀我啦？
媽：嘿嘿，你覺得有無可能呢？
晚上：
女：世界末日時，你都揀要你D花而唔要我啊！
媽（暗笑）：你冇野嘛，為咗Ｄ植物不斷發我爛渣？
女：你對Ｄ植物好過我！
媽：你未出世時我同爹哋講笑話如果生個仔就叫林草，女就叫林花。你係我肚裡面時，已經係我既花花草草啦。
2024年3月7日 星期四
母親節前夕
女：媽咪，嚟緊星期日係（英國）母親節，你想要咩禮物？
媽：花丫，我想要種得果Ｄ，唔係花束。
女：我畫比你啦。
媽：又得。
女：不如星期日去Ｃｅｎｔｒａｌ Ｌｏｎｄｏｎ？
媽：你考緊試喎，去Ｃｅｎｔｒａｌ Ｌｏｎｄｏｎ做乜？
（講真，考不考試於她日常應該沒甚麼分別的。）
女：我想食泡芙。
媽：你講緊母親節，唔係兒童節／你生日喎。
2023年10月11日 星期三
從家電到手機
一年多前初到埗住的香港人村，租金較同區物業明顯高昂，不過，單位內總算配備了優質的傢俬和電器等。
搬家之後，前屋主留下的入牆式原裝電器，都是相對大眾化的品牌。
我們的洗碗部董事長說：呢部洗碗碟機Ｄ間格冇之前嗰部咁好用，大牌子即係大牌子！
總廚回應道：無計啦，之前用最頂級電器，而本屋苑原裝配置只屬中價貨色，無得咁比較。一開始用慣好嘢，真係返唔到轉頭。
然後，有人搭訕道：係咪好似我用電話咁，唔可以一開始就用最新型號？
嘿嘿，女兒總算明白了個大道理。
2023年8月9日 星期三
搭船與龍珠
記我家小姐是日兩則對話，如下：
其一
媽：第時我好似公公婆婆既年紀時，你會唔會請我搭商務客位去旅行架？
女兒眼睛瞪大，想了想之後說：我請你搭船丫。
媽：都好喎，坐郵輪，ｄ嘢都幾好食。
女：搭艇仔啊，請埋你食艇仔粥都得。
其二
女：媽咪，我係你既咩嘢珠呀？
媽：咩豬呀，傻——豬？
女：嗰句話點講架？係咪咩隻手拎住龍珠？
媽咪眼睛眨了一眨，再眨多一眨，腦海不斷ｌｏａｄｉｎｇ再ｌｏａｄｉｎｇ之後，忽然，靈光一閃，問道：你係咪想話掌上明珠呀？
女：好似係，但聽完都唔明。
媽：有Ｄ人好珍愛自己個女，視愛女為捧在掌心會發光既珍珠咁寶貴。
女：係呀係呀。
媽：唔知關龍珠咩事。
女：ｄｒａｇｏｎ ｂａｌｌ，好珍貴嘛。
媽咪其實心想：哪有人會狂妄自稱為父母的掌上明珠！
2023年6月27日 星期二
想看屋的人
「我地已經好耐無睇過屋，幾時會再去睇？」女兒竟然忽爾說。
是的，已有兩個月沒看過屋了。起首幾次，她覺得看屋這件事相當新奇有趣。之後，有人便多番抱怨不想去看了，老是說覺得在浪費時間。
媽咪沒正面回答她剛才的提問，而是四両撥千斤的說：你之前話去睇屋好悶嘛，而且，你無去睇啫，你點知我地有冇去睇呢！
2023年6月25日 星期日
感性的話
孩子的表姐在我們家小住了三晚，除了適應時差調節作息之外，難得來到她當然要見見鄰近的朋友，所以我們彼此交集的時間其實很有限，而是日下午便送她到火車站去，為明天展開的課程作好準備。
希望她過去幾天住得舒適自在啦！
女兒這幾天對住大表姐，大幅地減少了對我們的纏擾行為。既然少了纏擾，當然令彼此的磨擦亦顯著減少。所以，如果大表姐能多多到訪和留宿，那就好了，哈哈~
送走大表姐後，孩子忽爾對媽咪說：大舅父好犀利，一個人湊到表姐咁大個！
是的，大表姐的媽媽於她還讀幼稚園時不幸離世，大舅父便成了含辛茹苦的單親爸爸。
還是首次聽女兒說這種感性的話，嗯嗯，快十二歲的思維，原來是這樣的。
2023年4月22日 星期六
老人與住屋問題
去到人生近半百，媽咪深深感受到某些機能在退化，尤其明顯的是記性。
這天，媽咪又因沒記性而自嘲老人痴呆，便打趣地問家中兩員：點算啊？
爹哋直指不用擔心，他會好好照顧我。但我還是回了一句：你估你好得我好多！
彼此莞爾。
然後，媽咪又打趣道：而家有時連表達能力都好似退化緊，第時語言區可能亂到中英文夾埋唔知講乜，甚至無端端又識講其他語言。隨即便拋出一兩句從女兒那兒學來的不標準西班牙語。
女兒大笑，直指媽咪發音不準。
說著說著，提到本地有些老人護理服務，不少長者是賣了家產後入住安老。
媽咪笑向爹哋說：咁我地第時賣咗間屋吐現，用Ｄ錢去住呢Ｄ護老院啦，雖然我地而家連屋都未買。
爹哋點頭示意。
冷不防女兒大驚，並說：你地賣屋，咁我第時住邊？
媽咪冷笑道：你真係覺得好多年後你都仲同緊我地一齊住？
此刻，她當然說是。
2023年4月20日 星期四
點知啫
女兒的體育服，總是塞進ＰＥ ｋｉｄ內，已經很久沒見她拿出來清洗。穿著的人是她，既然她不介意，媽咪亦省心。
是日，有人終於拿了衛衣和運動褲出來說要清洗。
很好很好。
順手拿起衣服檢查有否破損那些，卻發現衛衣上寫了人家的名字，旋即追問：呢件衫邊個架？邊個係ＸＸＸ（對方名字）？你幾時同人掉轉咗件衫？點解會同人調轉咗都唔知？
她晦氣回答，離不開說：我點知啫、咁又點呢、有咩問題啊？
背後應該是在表達：能帶齊整套衣服回就是了，不要小題大造。
犀利。
反正穿的人是她，好的，不理了。
2023年3月19日 星期日
Touch screen
三口子說起家中電腦設備，媽咪才驚覺自己使用了好幾年的手提電腦，已是當中最落後的一部。
媽：係喎，原來得我部機無ｔｏｕｃｈｓｃｒｅｅｎ。
女：你都可以ｔｏｕｃｈ ｓｃｒｅｅｎ架，不過佢無反應之嘛。
英國的母親節在復活節前，入鄉隨俗，我們這天便慶祝了。
 |
| 孩子送來的，由從前手繪賀卡變成電子花和玩偶了 |
2023年2月3日 星期五
零十分
一如每個早上，女兒的鬧鐘作響多時。良久，她叫停了Ａｌｅｘａ後便走到爹娘床裡去，牽被子打算繼續安睡。
媽：過咗七點喇，快Ｄ起身。
女：零十分先。
媽咪當然明白她是指７：１０，但還是說：咩零十分？邊有人咁講中文。
女：英文話ｓｅｖｅｎ ｏ ｔｅｎ嘛。
她把中英文法、語法和用法胡亂切換，也不是甚麼稀奇事，聽起來雖有點古怪但感覺妙不可言。
忽然想起大學時選修了一科有關廣東話發展與流變，印象中講者是來自加國的客席教授，而課程肯定是那幾年裡最有趣和歡樂的，沒有之一。
如果幾十年後，有人研究這班在英長大港童的母語變化，應該也有眾多妙趣的發現。
2023年2月2日 星期四
強項
近日，女兒老是要求飼養寵物，媽咪都以她未能好好照顧自己而拒絕。
是夜吃完飯，媽咪多番提她要清潔桌面，不果。
媽：養寵物？連我叫你抺好張枱都未有能力，點照顧寵物？！
女：我要做比你睇，我可以養到寵物。說時，她立刻拿布抺枱。
媽：做？即係扮出黎啦。
女：唔係「做」，係「證明」比你地睇，都話我中文唔好啦。
爸：扮嘢係你強項喎。
女：扮嘢唔係，發脾氣先係。
媽：好彩你知。
2023年1月2日 星期一
名字由來
是夜，女兒問起自己名字的由來。她忽然驚覺自己的中英文名字發音，原來頗相似。十一年下來，她終於開心大發現了。
媽：我地係定咗你中文名再揀英文名。
女：咁點解我個中文名得一個字？
隨即，她又提出另一個心中疑問：我見香港同學，例如佢叫陳小明Ｓｕｅ，老師有時會叫佢Ｓｕｅ，Ｓｉｕ Ｍｉｎｇ Ｃｈａｎ，但點解我英文名咁短？
媽：你未出世我地就知你懶（哈～），中文名改一個字，等你可以寫少ｄ。而英文名我地又特意唔加拼音，於是你又可以寫少ｄ字母。
看她表情，似乎相當領受我們的「好意」。
半晌，她又問：我個名有咩意思架？
媽：查看資料，你個英文名原來為一般人帶來愉悅感，而我地都希望你做人開開心心。至於中文名，字本義含有平安之謂，你平安健康就好！嗱，你個名之中包含個「青」字，知唔知點解？
女：因為我面青青囉！
嘿嘿，這孩子真是妙不可言。
媽：我地係希望你青出於藍。
女：即係咩呀？
媽咪簡單地解釋了詞義，並表示在改名時，爹娘彼此寄望她將來各方面都青出於藍。
但她回了一句：冇可能啦，我ｄ中文咁差，邊可能叻過你！
媽：要你學好中文，真係有ｄ難度，但你其他範疇一定有嘢叻過我嘛。
但願她更認識自己的強項，亦更好地建立自信心。
訂閱：
文章 (Atom)
