閒談選校

這個星期，學校已不設功課，女兒每天放學後都開開心心地玩。的確，爹娘發覺她近日心情亦相對好一些，情緒亦較穩定。
是日送她入課室後。。。
師：而家冇功課做，佢係咪好開心？
老師真是太了解這個孩子了。
媽：係呀，日日為唔使做功課開心到不得了。呢個小朋友真係好唔鍾意做功課。
師：打算揀咩小學？
媽：呢個時勢，邊到我話揀邊間，睇考到邊間啦，而且又唔一定考得到，都係睇佢造化喇！
師：你地住邊區？
媽：都係個大區，有比較多學校可以揀。
師：到時填間區內好少少既學校囉。
另一同學媽咪搭訕道：你樓下間ＸＸ好好呀，好多人鍾意架喎。
師：係囉，呢間都幾好丫。
媽：仲好近我地，過條馬路就到。
師：咁好呀！
媽：抽到就係囉。
就以上一席話，媽咪發現原來作為幼師，總要認識一下各區小學的情況，以便跟十九區的家長閒聊。又，儘管住在區外的同學家長，竟然都相當熟悉本區的戰況。
勁！

上學遲到記

幼稚園上了快兩個學年，女兒還是首次遲到。
上學途中，前面遇著交通意外，無處可逃。原來當學校正門關上後，一定要走後門的（嘿）。又原來，就算有校車叔叔正巧從側門外開門鎖入校，孩子也得等庶務嬸嬸來開門，才能進入。
滿以為今天終於可以見識到傳說中的"Late"印，放學後打開手冊一看，竟然又是往常見慣見熟的花花印，媽咪很無聊地感到有點失望。
假想庶務嬸嬸直接帶女兒上課室，原來是領她到校務處去簽個名，然後她便自行走到班房去。
媽咪當然是乘機嚇嚇素來慢吞吞的孩子：你睇下遲到幾麻煩，而家校務處要你簽名記錄在案喇。所以我地成日提你要快手Ｄ，唔好再遲到喇。
守時是個美德，無論如何應該從年幼時培養起時間觀念。

童言兩則

其一
六月的不同飯局，加上飲宴和父親節飯，近日吃得有點太肥膩，於是爹娘是日下午外出遊玩後，決定回家煮個簡便晚餐，便帶女兒到街市買點青菜。
女：媽咪，你以後都唔好買洋蔥喇。
媽：點解？
（心底盤算：你梗係又想話唔鍾意食／唔想食呢Ｄ啦！）
女：你切親洋蔥都猛標眼水。
聽罷，相當窩心又慚愧。

其二
回家的車程，女兒要求媽咪跟她每人輪流說一種野生動物。在出現了野兔、野馬等大路動物後，媽咪開始說得有點敷衍了：野曱甴。
女兒大笑，卻沒有異議接著說：野蝴蝶。
媽：蝴蝶邊有人養架，梗係野生架啦。
女兒字字鏗鏘的說：曱甴夠係啦，媽咪！
係喎！
這個小朋友，腦筋轉得愈來愈快，舉一反三。

罸企記

接放學時，女兒說要等好朋友一起離去。終於見到對方的媽媽來了，孩子高興得跳蹦蹦。及至好友也出來了，女兒興奮地跳來跳去，但見友人滿懷心事似的，對方媽媽追問發生了甚麼事，才知道原來兩個小女孩給老師責難了幾句。
咱們家孩子，被老師教訓了之後，一轉頭便當甚麼事都沒發生過似的。從積極的層面上看，她非常樂天，而其實媽咪知道：鬧她，有時很嘥氣！
鬱悶的情緒似乎會傳染，兩個小女孩結果都心事重重的離開了校門。
道別之後，媽咪八卦又好奇，到底她們今天在學校怎麼了？只是，女兒擺出一副不欲多提的嘴臉，猛說不想告知。她愈不說媽咪則愈好奇，口不對心地猛說：你唔想講唔緊要，如果你之後想講我隨時都想聽；另一方面不斷以試探式口吻：係咪乜乜乜？係咪物物物？
終於她說出來了：頭先我地兩個出咗去交墊枱紙，當時老師冇叫我地交出去。
媽咪心底不禁「車」了一聲－－咁小事！
媽：哦！老師話你地冇留心，所以話你地？
女：係呀，之後要罸企。
（罰企，乜咁似小學？？）
媽：老師好惡咩？
女：唔係呀。
媽：你地係咪掛住傾偈呀？要留心上堂架！罸企咁醜怪，你試過幾多次？
女：一次之嘛。
媽咪半信半疑。

獨立和依賴

校裙的鈕扣一粒接一粒慢慢扣上，孩子的動作不算俐落，但總算不用假手於人，可以自己換上校服。然後，她又緩緩的穿好襪子和皮鞋。
媽：好叻喎， 自己換好晒校服，大個女喇。
女：係呀，我唔使人幫，自己著好校服。就算有工人姐姐，都要自己著架。
媽：老師咁同你地講？
女：係。
媽咪心底有點安慰，這個孩子開始愈來愈獨立了。
送入校門去了，按往常慣例，媽咪都會把書包交回到女兒手中，這天卻忽爾「行好心」一直給她拿著。今年的課室在樓上，母女倆便牽著手，一起行上去。樓梯走了一半，媽咪已經提醒道：拎番自己個書包喇。
孩子似乎充耳不聞。這個四、五歲的寶寶，有時仍會相當依賴媽咪的協助。
話口未完，恰巧遇上副班主任，女兒嘹亮地向對方說午安後，隨之而來的一句是：媽咪，俾番個書包我！
媽咪暗自竊笑：嘿，有人知衰喇！
相信老師在孩子們面前說過，要她們自己拿書包，不應假手於人。

K2第五次生日會之頭髮亂了

這個星期只有三天上課。星期三放學後趁端午節假期帶孩子到深圳家探爺爺嫲嫲，並小住一天。孩子當正度假一樣，整天就是吃喝玩樂，流連忘返。
星期五學校開生日會，又是大玩。

放學時，見女兒披頭散髮，問她玩了甚麼這般激烈？她就是維維諾諾。特意拍張照片給她看看實況，她竟然說很漂亮。

交她給老師時，明明整齊有緻的

放學時變成這個嚇人模樣

小跳豆

接放學時，女兒興沖沖的由課室走出來，伴著一彈一跳。
師：佢真係個好開心既小朋友，成粒小跳豆咁。
形容咱們家女兒做一粒小跳豆，媽咪覺得相當傳神。
媽：跳跳紥，無時停。
師：佢呀，今日上堂掛住同Ｘ（好朋友）傾偈，搞到Ｘ計錯咗一條數。
媽：係？等我一陣同佢傾下先。
離開校園後。。。
媽：今日返學開唔開心呀？
女：開心。
媽：開心就好啦。今日係咪有做數學堂課紙，要計數？
女：唔記得喇。
媽：唔記得？啱啱放學咋喎！老師話你掛住同Ｘ傾偈，搞到佢計錯咗一條數喎。
女：我話佢知計錯咗，提佢改番啱。
媽：咁你計錯咗幾多條？
女：我啱晒。
媽（半信半疑又白天鵝上身）：你派番堂課紙時我咪知囉。你要專心上堂架，同Ｘ傾偈搞到佢分心計錯數。上堂要留心聽老師講嘢唔係掛住自己講架嘛，你講嘢又會騷擾人地！
女（貌似極度乖巧）：知喇媽咪。
然後，她又繼續做其小跳豆了。

講道理

慢吞吞女兒，又把媽咪的話當耳邊風，好聲好氣說了多次都不配合，媽咪扯火了。。。
媽：點解你次次都係咁，講極都唔聽！。。。。。。！！！
（下省數十字）
女（雙目一個流轉，慢慢從嘴邊吐出以下幾個字來）：你－做－乜－咁－大－聲？
媽：。。。。。。
這孩子的談判技巧原來相當不俗，她的冷靜與沉著，竟令媽咪有點語塞。
女：你知唔知鬧人係唔啱架？
媽咪立時按捺住心中的一團火，想：大聲鬧確係冇用，但起碼喚起你注視喎！
過了十五分鐘，媽咪重提舊事：
媽：點解我頭先要咁大聲呢？係因為我同你好聲好氣講咗好多次，你都唔理我。
她好像很明白事理似的點著頭，只是，媽咪深深明白：由好言相向到扯火大罵，這些情節總是不斷在家中重複上演。

親朋友好飯聚

一連三晚跟不同的親朋友好飯聚，女兒的情緒都相當高漲，偶爾更會失控尖叫。。。
所以，可能大排檔和茶記最適合她。

這夜，送她入睡房後又一如以往，她要進進出出許多回仍未肯睡。小妹忽然感性：媽咪，我唔想你老！
媽咪看了看她，沒好氣的說：你好驚我老？咁你唔好激我咁多啦！
話才說完，發現她小嘴一扁，媽咪便擁了她入懷；小妮子忽爾淚如雨下，哭得淒涼，猛說很怕媽咪老了。。。
難道媽咪近來多了幾條魚尾紋？？嘿嘿嘿～～
見她哭得淒然，媽咪亦忽然鼻頭一酸：這個女兒，有時激心，有時相當窩心。

爆seed 做功課

訂了枱在黃昏六點半吃飯，以女兒回到家差不多五點半計，她大約有半小時做功課，然後更衣再開車去，時間正好。一早已預算她不能完成所有功課，但起碼都做好一兩樣吧。
今天，她爆ｓｅｅｄ了！
這個孩子，是日竟然只花了二十分鐘，便完成所有作業。這小怪獸根本有能力在這個時間內完成，只是平時太沒動力去盡快做吧！
唉，幹嗎老要消磨一個多小時？彼此都痛苦！
然後，媽咪大大誇讚她做得又快又好，期望她之後都可以專心努力做功課。
帶小朋友食自助餐，委實很不化算：是夜的主題是海鮮，咱們家孩子甚麼都說不吃，在食物枱上卻拿了好些餅乾回來，便歡天喜地的吃著。。。。。。