血壓：136/75(左手)，125/68 (右手)，度完第一次，姑娘問我是否很緊張，著我深呼吸後再量右手。其實我不緊張，但每每量第一次都有少少超標！
心跳：95，90
波波心跳：153
近幾次產檢的等候時間，好似一次比一次長，今日便得花1.5小時了。
今天的助產士很健談...
她：有無同BB講數，想佢幾時出世？
媽：有啊，成日都希望佢快D。
（明知今日稍後有乙鏈報告，快Ｄ都好啊！日日陀住塊石頭，波媽都挺辛苦的）
她：咁有無同佢講最遲幾時好出世喇？
媽：又無喎，睇佢自己想幾時囉，不過成日同佢講，到時唔好搞咁耐，快手快腳好出黎喇！
一輪檢查後...
她：咦，你膀胱好脹，係咪好急？
媽：係呀，不過成日都好急咁，所以無理到。
她：你下次去咗廁所先嘛，BB落咗黎，壓住膀胱你會成日都好急架。而家按佢頭仔就俾膀胱脹實頂住，我要大力少少先按到佢頭位，太痛你就出聲。
都不算太大力吧，姑娘其實好溫柔。
她：先生會唔會陪產？
爸：會啊。
她：剪唔剪臍帶呢？
爸：都想剪。
媽：我聽過好似話係你地剪咗先俾爹哋剪架喎...
爸：係囉，咁剪黎做乜架？
媽：係咪當做剪彩儀式咁？
夫妻倆你一言我一語，七嘴八舌的回應著。
她：梗唔係我地剪！（面向波爸）我地之前會教你點剪，如果剪得唔好，我地先會補多一下。
媽：咁又係喎，否則咪愈剪愈短^^
她：又唔會，我地有個夾夾實臍帶先俾你剪。
媽：你地D較剪應該好利，我諗一剪就得啦？
她：唔一定架，有時好緊張的話，未必一剪就好。
波爸媽相視而笑。......
媽：鐵丸同葉酸食埋今日都食晒，我仲使唔使食？
她：咁我俾到40W你...都係唔好，俾夠41W你。
媽：唔好搞咁耐都未生喇卦^^
她：呵，下星期番黎檢查，一係就產房見啦！
姑娘咁好傾，怪不得今天在外面要等這許久了。
題外話：
之一
上星期驗乙鏈，波媽中午前收到診所來電，我過關了，yeah~
之二：
媽：你到時剪臍帶會唔會好緊張架？
爸：應該都唔會既，不過，不如買定Ｄ豬腸練下先囉。:>
波波啊，爹哋竟然當你條臍帶係豬腸喎，嘩哈哈～
較新的文章
