Ｋ３專題研習

學校進入學期尾的專題研習週，放學已經不設功課，女兒比較多時間跟媽咪閒話家常。
女：媽咪，你知唔知長頸鹿條頸有幾多節骨？
媽（沒半點概念）：三十？
女：長頸鹿雖然條頸咁長，但佢同人類一樣，係有七節頸骨。
媽：哦哦！
女：咁你知唔知長頸鹿條脷有幾長？
媽：唔知呀。
女：係五呎。
媽：唔係啩？！
女：係呀，五呎。
然後，她以手比劃，媽咪一瞥，那大概是５０ｃｍ吧，便立時上網翻查資料，果然是５０ｃｍ。
媽：傻女，你記錯咗老師講既長度單位，係厘米，唔係呎！不過媽咪肯定你好留心聽老師講解，所以你比劃既長度好準確啊！

 

 記得放學後，女兒坐在車裡時，興致勃勃的分享在學校內的專題講座。

看女兒帶回來的小冊子，今天的講員應該是漁護處人員吧

女：今日有個叔叔黎學校同我地分享有關動物既嘢。你知唔知熊貓好珍貴，佢地就黎絕種？
媽：係呀，所以熊貓係中國國寶。
女：仲有，你知唔知猩猩都瀕危。
媽咪有點驚訝她明白瀕危的意思，隨即再問她多一點。
媽：點解猩猩會瀕危？
女：因為Ｄ人斬晒森林既樹木，Ｄ猩猩冇地方住又冇晒Ｄ食物，所以地球得番愈來愈少猩猩喇。
本年度的專題研習，是有關動物的課題。這幾天上學之後，女兒似乎已成為一個小小動物專家了。