試工

開學之初，老師派了一張表格，請同學自行剔選有興趣出任的班務工作。媽咪一早知道，女兒想做班長。剔好小格後，要填上原因的。

媽：你點解想做班長？

女：我就係想做囉。

媽：問你點解想做，你只係答想做，呢個唔係原因。不如你寫「可以學習管理同學」？

女：我唔使學，因為我識！

媽（忍笑）：我地做人要謙虛D，好多嘢要不斷學習架。

她沒有異議的填上了這個原因。

早前，女兒告訴媽咪一件小事：我為咗想老師選我做班長，呢排我都專登好乖。

八歲的孩子，已懂做這些事情。這天放學時，女兒興奮地說：我今日做咗一日預習班長。
開學兩星期，據知班長一職一直未落實。以往聽女兒說，過往兩年的班主任，都有讓不同的學生嘗試擔任班長一兩天，這種體驗，姑且叫做「試工」吧！

女兒這是自小學以來首次試工，見她喜形於色，一定是個很棒的體驗吧！試工的同學不少，不知最後花落誰家。