放學回家了，母女倆閒話家常，當中有些對話，令媽咪非常深刻。。
其一
女：點解個個女同學都未認得，但羅老師（班主任）已經識我？
媽（滴汗）：。。。
（媽咪心底大概估算到原因的，但還是努力短時間內腦筋急轉彎）
媽：你點知道佢識你？
女：佢點名，我地企起身一次之嘛，佢之後就叫得出我個名，但其他女同學佢都未認得。
媽：係咪全班女同學得你一個短頭髮呢？
（記得小二學期尾，女兒剪短了頭髮後，說過全班女同學中只得她一個不用紮辮上學）
女兒沉思了一會，說：仲有一個女同學係短頭髮喎。
媽：我知喇！今日望咗你班名單一次，全班之中，你個名最短，所以最易記！
（嘿嘿，媽咪其實很欣賞自己的急才！）
其二
媽：我睇咗電子通告，你地今年改咗每逢考試之前果日，都只返半日，即係多咗四次早放學，係咪好開心呢？
女：咁又點丫？！
媽：早放唔好咩？返黎休息下又好，早Ｄ溫習都好。
女：唉！你又點會比我休息咁好，一定叫我溫習啦！
媽咪大笑不止。
其三
媽：今年轉咗校車姨姨，係咪無之前果個咁惡？
女：一樣咁惡！不過有一樣嘢好咗，以前姨姨唔比我地響校車內傾偈，就算細細聲都唔得，但佢講嘢又鬼咁大聲，唔公平。而家新姨姨比我地傾偈，就算好大聲都唔理我地架！
（在要求小孩遵守規則的同時，大人確實有責任自己先做個好榜樣，嘿嘿～）
較新的文章
