爛收據

黃昏時，媽咪在廚房，孩子忽然走進來，拿著一件她暑假期間做的小手工，就是把兩個廁紙筒中間連著一張小紙做的望遠鏡。
她，明顯有點不安。
女：媽咪，我搵到喇！
媽：搵到咩？
女：要交比老師果張單。（六月時預繳本年度簿費的收據）
媽咪端視她的小手工，原來之前一直找不到的收據，被她「廢物利用」了。但那望遠鏡只用了半張收據。
媽：另外半張紙呢？有冇留低？
女：有啊，不過剪碎晒。
媽：你拎出嚟，我地貼返好之後交啦。
她入房找了一輪，說：冇喇，原來喺垃圾桶，尋晚倒咗。
媽：我地照交半張啦。
女：唔得架。
媽：有咩問題？
女：我驚老師鬧。
豆大的淚珠，從她臉上滑下。媽咪從來都覺得她在自己面前膽大包天，卻為了那爛收據而怕得哭起來。雖然覺得只是一樁小事，但媽咪腦海浮現出「同埋心」一詞來。
媽：原來好驚老師鬧你整爛咗，嗯，不如我同你寫個小便條，等老師知道你無心整爛咗，我留埋電話號碼，佢可以隨時聯絡我，咁好唔好？況且，媽咪好欣賞你原本係想費物利用，只係當時唔小心用錯咗張單啫。
女：不如唔交啦？！
媽：既然搵到，點解唔交？
女：媽咪，因為你唔提我張紙要用，所以我用錯咗咋。。。
媽：嗱嗱嗱！你如果推卸責任就唔啱喇！
她沉思了晌，說：媽咪，不如你聽日親自同老師講啦，我好驚！
媽：其實你驚Ｄ咩？
女：我驚佢話比訓導主任聽。
呵呵，她之前總是說不怕訓導主任的！
媽：呢Ｄ事，老師點會同訓導主任講，佢地大家都好忙。
女：但我響張單後面畫花晒。
說罷，她淚如雨下了。記得她說過，老師不許他們畫花書簿的。

這半張收據殘骸，令孩子哭成淚人

媽：你畫既圖畫幾靚丫，如果驚老師話你畫花晒，不如我地用塗改帶啦。
她卻沒有行動。
媽：得架喇，我寫好咗張便條貼埋上你收據度，你聽日直接交比老師，佢睇完有問題會搵我。
她的情緒仍有點起伏，其實，爹娘深信老師才不會為一張爛收據操心，但，畢竟女兒還是個孩子！