被罰記

兩天之前，孩子似乎在書包內收起了一些東西，神神秘秘。她起初說當晚會告訴媽咪，但那晚入睡前她一反常態，不用媽咪陪瞓，亦不欲多言。媽咪雖然很想知道，只是按捺住心底的好奇，然後繼續觀察。

昨晚入睡前，這傢伙主動重提舊事，但仍然吞吞吐吐，欲說還休。看著她困擾地腦內交戰，媽咪有嘗試引導但不湊效，雖然心底更好奇，不過亦尊重她。

這天接放學，小傢伙終於和盤托出了：前日我同Ｄ同學響課室度好嘈，某老師入黎後問邊個有份大聲講嘢既要企出黎，我當時冇企到，但比同學舉報咗！某老師冇罰到企起身既同學，但要我返屋企罰抄「我以後要誠實」五次，所以前日我好驚你見到我書包張紙。不過我冇抄晒，所以冇交到！

媽咪心想：好傢伙！這孩子的膽子果真不小。

女兒續說：今朝我幫老師拎簿去教員室，遇到罰我的某老師。

媽咪忍住笑問：咁佢有冇好惡咁捉實你？

女兒說：點會呢！老師要我今日食飯時去佢課室度抄十次，佢話抄完之後，呢件事就會擺平喇。

咁叫抄十次？老師也太便宜她了，雖然媽咪覺得罰抄意義不大

媽咪跟她一起歸納事件的教訓：即係因為你同一Ｄ同學好嘈，老師唔罰承認自己嘈既同學，但就罰你。咁事件中你覺得自己學識咗咩？

女兒認真地回答：我知道講大話唔啱，做人要誠實！

媽咪強化她這個總結，說：係喎，有時我地做錯事，只要肯承擔，都有機會被原諒。但如果我地不誠實，反而錯上加錯喎！

女兒點頭表示明白，亦說自己很驚這位老師。她補充道：去到佢課室食飯再罰抄，我一粒飯都食晒呀，因為佢唔比人食剩嘢。

媽咪半帶開玩笑說：說不定出年就係佢做你班主任喇。

女兒連聲說不好。

之後，媽咪追問：你忍住幾日唔同我講呢件事，係驚我鬧你？

女兒再次點頭，說：係呀。

媽咪打趣問：你係唔啱架喇，但我有冇鬧你？

女兒擰了擰頭。
她自知有錯，一方面怕被媽咪責難，另一方面又很想被開導。想著她這幾天以來的心理交戰，哈哈，真有點自作自受！

一如以往，女兒校內的行為問題，媽咪都交由老師處理，回來只說教不責罰——要她因做錯一件事而承受雙重處罰，媽咪自覺於理不合。

況且，孩子跟自己分享被罰的事，不是必然的：她大可以半句不說。所以，媽咪心底欣慰這孩子願意跟自己說她知錯了！