欠書記

每當學期開課時，老師都會先收集學生的作業、ｒｅａｄｅｒｓ和ｐｈｏｎｉｃｓ書等。昨天已見手冊寫上今日要交回作業，今天放學時，媽咪多口向女兒問句：有冇交齊書呀？
女：媽咪，ＮＥＴ寫手冊話要帶返Ｄ故事書返學。
媽：帶漏咗咩書？咁你去書櫃搵番齊Ｄ書啦。
女：冇呀，我已經搵過。
媽：冇？點解會冇？
女：有Ｄ同學都冇喎。
媽：有幾多同學冇？
女：好似幾個。
媽：即係大部分同學都有啦，係咪你放暑假時拎過Ｄ書出黎睇，之後唔知塞咗去邊？
（媽咪有依稀印象，記得學期尾派書那天，她雅興大發地拿了一些書來看，當時已提她要執好。）
女：我只係睇過一本恐龍故事書，其他我都冇見過。
媽：定係你冇手尾又冇記性咋！快Ｄ自己搵！
女：我唔知啊。
說罷，孩子便開始哭哭鬧鬧，大發脾氣了。
然後，三口子便展開了翻箱倒匣的尋寶遊戲。最慘的是：暑假開始時我們把全屋大執了一次。。。那兩本薄薄的小書，會否夾在書櫃某格？是否跌了在某些櫃縫之中呢？？
更要命的是：女兒只能說出其中一本故事書的名字，另一本更已忘了。。。
媽：尋日你執書時，我記得夾住咗張派書清單，書單上面有書名架。
良久，爹哋找到書單了，媽咪一看，大笑良久：原來係書商欠書！
從這件事上，媽咪看到兩樣事情：
一　學校行政果然仍有改善空間——明明是書商欠書，學校理應比家長更清晰吧！這種混亂，導致家長浪費了時間去處理。當然，這也不是甚麼大問題，是學校和老師之間溝通不足吧。
二 　媽咪對女兒的信任度也太低了吧！明明她從沒見過那兩本故事書，卻不被信任，受了滿腔委屈，不大哭才怪！
然後，媽咪向女兒解釋清楚事件始末，算是還她一個公道。此外，也在手冊通訊欄內填寫了相關實況，請ＮＥＴ查看。