第一個半天的課堂

開學日，只半天課。
接女兒放學前先在有蓋操場上等候，到來的家長有點多，場面比較擁擠和混亂。
不消一刻，見女兒班魚貫進場。當班主任問他們誰見到自己的家長便舉手示意時，女兒旋即舉起手來，似乎她相當留心聽老師的指令。
接過她後，先問她今天可過得開心？她點頭示意。
媽：今日係咪有去禮堂行開學禮？
女：係呀。
媽：係咪有唱詩歌？
女：有唱校歌，不過Ｄ哥哥姐姐唱，我地唔識唱。
媽：有無祈禱？
女：有。
媽：係咪要瞌埋眼？
女：係。
（女兒應該覺得媽咪是個先知，竟然不在場都知道她在校的情況。）
媽（陰笑）：祈禱時有無靜靜雞打開眼？
女：有呀，哈哈哈。
（果然不出媽咪所料，而女兒的笑聲，有點自知做了壞事的感覺，但試問讀教會學校的小孩，哪個沒試過呢！）
媽：咁有無其他小朋友都打開眼？
女：無呀。

由開學禮打開了話題之後，媽咪欲更進一步了解是日在校的活動。
媽：咁開學禮完咗之後，你地仲做咗Ｄ咩？
女（埋怨）：睇電視，睇咗好耐電視呀。
（竟然看電視都會埋怨？？）
媽：睇乜電視？
女：普通話囉，睇咗好耐。
媽：咁老師當時做乜？
女：唔知呀，無嘢做。。。媽咪，我今日有少少唔乖。。。
（吃了誠實豆沙包吧！）
媽（小聲地）：你做乜事唔乖？
女：我唔想睇電視。
媽（猜測）：跟住你走咗出位？
女：唔係，我同老師講我唔想睇。
媽：咁老師點答？
女：佢話老師做緊嘢，要安靜，但我真係睇咗好耐，我驚媽咪鬧，因為你話唔可以睇咁耐電視。
（擺媽咪上枱！）
媽咪推算老師是在處理班務，正在收／派回條、書籍和家長支票等，是故給他們塞個電子奶咀。只是，此奶咀明顯不合女兒口味。）
媽：學校老師比電視你睇，媽咪係唔會鬧架，因為學校既事係由老師安排。咁你之後有無安靜番？
女：有呀，之後我乖番。
（媽咪心底舒了一氣：只係咁，都唔算好唔乖啫！）
媽：咁就啱喇，不過你同老師講嘢時有無舉手？
女：冇呀。
媽：你係咁嗌出去？
女：所以老師話我嘈囉。
媽：你記得下次想講嘢時要舉手喇，返學要有規矩嘛。

是日太早起床，女兒下午累極便小睡了片刻，期間班主任致電來。
媽咪立時心想：今日唔係真係咁曳丫嘛？！原來老師主要是記錄搭校車的事情。
女兒醒來後。。。
媽：頭先班主任打俾我，你估佢同我講乜？
女：唔知呀。
媽：你估下先啦，會唔會係講你今日唔乖既嘢呢？
女：即係有冇講呀？
媽：你估下啦。
女（哀求）：媽咪你可唔可以話比我知呀？
媽：佢同我傾下星期一放學既安排，不過你記住返學要乖Ｄ呀，否則老師隨時會打俾我架。
女：媽咪，我知道喇！