小二全方位學習日

記得，去年全方位學習日去濕地公園，當天氣溫在十度以下。今天去海洋公園，氣溫稍高一點，有十二三度。
昨天一整日，都是校內研習，包括海洋公園派員到校主講如何保育海洋。也有其他集體活動和手工等，豐富多姿。今天嘛，是他們最開心的遊園活動。放學後，聽孩子津津樂道她的見聞。
女：今日我地企係隻大海獅側邊影相呀。
媽：嘩，好勁喎！有無得餵佢地？
女：要答啱問題先有得餵。
媽：咁你有無試答？
女：冇，唔想答。
對於要答問題，她總是不踴躍，媽咪覺得她是害怕答錯。

女：今日我地食魚柳包同蘋果批，蘋果批好難食，但粟米杯又比人攞晒喎。
媽：係咪你太慢呀？
女：我地組比其他組睇同玩多咗好多嘢架，只得我地有得去玩黏土整海獅咋！

活動教學，對於女兒的學習成效是明顯的。
女：媽咪，你知唔知如果在海洋裡發現海豚屍體要打邊個電話號碼？
媽：９９９？
女：１８。。。
媽：１８２３？
女：係呀，你點知架？
媽：呢個係政府一線通電話。
女：點解個電話咁短，得四個數字？
媽：因為等人易記Ｄ。打完呢個電話會點架？
女：佢地會通知海洋公園派員去檢查條屍體。

女：你知唔知鎚頭鯨有幾多隻牙齒？
媽：一百？
女：梗係唔止啦。

女：你知唔知我地鞋上面既魔術貼，係參考乜嘢而發明？
媽：唔知喎！
女：係蒼耳。
媽：乜嘢叫蒼耳？
女：即係黐頭芒呀。
媽：哦！你點知架？
女（得意洋洋）：我就係知啦。

女：你知唔知我地用既吸盤係根據咩黎發明？
媽：蜥蜴？
女：係八爪魚！

女：你知唔知飛機係參考邊種鳥類而發明？
媽（心想）：鳥類就是鳥類，不用分得那麼小吧！
媽：係咩鳥呢？
女：係麻鷹。

她娓娓道來，顯然非常享受這種走出課室所帶來的學趣。