「我覺得好醜怪」

早上，女兒用臉部油彩在臉上畫了好幾筆。
媽：你今日要返學喎，做乜畫花晒自己？
女：我唔想返學。
女兒少有會說不想上學，媽咪不明所以。
媽：要返學架，返埋今日，聽日就放假，下星期一開party，幾開心！
女：我唔鍾意返學。
媽：係咪有嘢唔開心呀。
女：我唔話你知。
唔話我知，即是啦。
媽：尋日老師派咗Ｄ書俾你地，有一本我地屋企有，不如今日你送俾其中一個同學啦。
（每年學期尾，老師會把家長有份夾錢買的廣泛閱讀計劃的圖書均分給班中孩子）
女：要寫果Ｄ嘢，老師講咗三次我都寫唔到，我覺得好醜怪。。。
媽咪記得發回來的圖書，每本第一頁都有孩子寫的年度、班別和姓名等，嗯嗯，媽咪似乎明白了些甚麼。
媽：咁你下次留心Ｄ，就會做到喇。
回到課室了，女兒立時把圖書塞給媽咪，說：老師話唔可以拎Ｄ書出黎架。
媽：得，我幫你搞掂。
老師聞聲而至，問：做乜事？
媽：呢本書我地屋企有，我叫佢送俾其中一個同學。
師：咁你送俾邊個？
女：ＸＸＸ。
說罷，孩子便拿著書走到同學前去。
媽：尋日係咪你講咗幾次，佢都寫唔齊Ｄ資料？
師：佢識得返去同你講？
媽：佢今朝話唔想返學，好少可會咁，我問佢係咪返學唔開心，佢又唔答。佢本來唔肯講咩事，猛話覺得好醜怪，再問問下又講少少，我估估下咋。
師：尋日我叫佢地響Ｄ書首頁寫本年度、班別，同埋按中英文書寫番中英文姓名；寫完要佢地排隊出黎俾我檢查，同埋我要響書面同佢地寫番15-16，因為學校怕佢地將Ｋ１同出年Ｋ３收既書撈亂。佢排到隊我問佢係咪寫好，佢話係，但我一睇佢都冇寫齊，本本寫咗少少嘢就算，咁我同佢講多次要寫乜叫佢返去再寫過，如是者再出黎檢查又係咁。睇番班上個個小朋友都做到，按難度佢地係處理到架。佢做野唔夠認真，常常都有呢個問題，媽咪你要好好留意一下。
媽：係啦，佢好容易分心，又樣樣做少少就以為自己做好晒。。。
師：佢話覺得醜怪唔想講，即係佢開始有意識要做好，媽咪你可以把握呢點黎教佢。
媽：嗯！係囉，佢近來自尊心同自我意識都強咗好多，又大個咗少少喇。今年都辛苦晒你地教佢！
師：唔會唔會。