與職業治療師對談

早前和女兒見了臨床心理學家後，安排了排期見職業治療師。孩子的大小肌有問題嗎？媽咪沒有這方面的知識，不過反正當時臨床心理學家說，職業治療師也不一定會見我們。事情就這樣靜下來大半年。
這天，我們終於見職業治療師了，她首先和媽咪面談了十幾分鐘，了解女兒的各種情況，也察看了孩子的成績表，然後，我們展開了以下對話。。。
師：佢考得好好喎。
媽（有點意外）：ＯＫ啦。
師：以佢地既狀況來說，考試係好難架，佢真係考得好好喎！
媽：我其實唔係特別在意佢成績。
師：佢有讀寫，但又讀到又寫到，咁得意！
媽：可能佢只屬ｍａｒｇｉｎａｌ　ｃａｓｅ，所以各方面都唔算嚴重卦！
我禁不住心想：係你隔鄰辦公室既專家判斷佢有專注力問題同埋讀寫困難丫嘛，點解反而好似係我搵理由去合理化成件事呢？！
師：佢有冇睇專科？
媽：有，見咗醫生兩次。
師：咁佢使唔使食藥？
媽：醫生暫時認為佢唔使食藥。
師：咁仲使唔使覆診？
媽：要！九月覆診。
媽咪彷彿聽見她的言外之音是：以佢既情況，醫生可能唔再安排佢覆診。當然，這是當下自己的主觀感受。
師：咁你係咪覺得佢小肌有問題？
媽：佢成日寫幾個字就話攰，我唔知係佢專注力定小肌問題，加上佢寫字好大力，可能係咁都會易攰。反而我見佢成日行行下路會仆親，好似協調能力有問題咁。
師：佢本身專注力唔好，可能行路唔專心，諗咗第二Ｄ嘢，就好容易仆親，咁係解釋到喎。
她是專家、她閱人無數，媽咪留心聽著她的解說。
。。。。。。
女兒獨自入她房間做完一連串評估後，媽咪再次入去聽她的解說。。。
師：佢同我入房時已經蹦蹦跳跳，我見佢動作好穩架，大肌一定無問題。剛才同佢做評估時，佢坐得好定，坐姿比你同我都好，願意守規又無離位。不過，佢係有遊魂既，同佢講嘢係見到佢唔專注。各項評估所見，佢小肌無問題，係合格，但我要強調佢係屬於中間偏下，不過係合格線之內；有人會中高、有人會極高，但佢只係合格。其實人人都有強弱項，所以，其實係冇問題。
媽：合格就得啦。
師：我請佢抄咗一段字，你覺得抄得靚唔靚？
那幾行字相當工整，看得出女兒當時很用心去抄。
師：佢一分鐘大約寫到七個字，速度正常。我見佢抄寫時，都無出現一般讀寫小朋友常見既鏡面字、反轉字呢Ｄ，而且一般佢地好容易會寫錯筆順，但佢大部分筆順都啱架喎。
說到這裡，媽咪又想起剛才自己心底的話：係你個同事話佢有讀寫架嘛！
不過話說回來，女兒一直以來，讀的困難比寫的明顯大！
師：佢執筆姿勢唔正確，所以會好易攰。
媽：佢專注力咁弱，如果做功課時我仲成日打斷佢提佢執筆，會唔會唔係咁好呢？
師：同意呀，所以頭先佢寫時，我全程都由得佢寫架。。。。。。做人最緊要係開心，如果有個人樣樣要求自己好高，咁佢好容易會唔開心喎，但你個女剛才同我講：有Ｄ嘢好難，所以唔想做。如果想佢改善執筆，應該係佢要有呢個內在動機先。
媽：我同意佢係一個開心既小朋友，咁對於佢執筆來說，我可以點做呢？
師：人一出世就係一個個體，冇得話我地要點樣操控佢地架喇，就算佢地要選擇做一個壞人，我地都冇辦法！我地只可以提點下、鼓勵下架咋。你可以多Ｄ提醒佢，但想唔想改，都係睇佢自己。
她說到「壞人論」時，有點太激動，使我不得不亂扣帽子，把近日社運中的眾矢之的代入去胡思亂想。
而是日跟職業治療師的一席話，給媽咪再一次的提醒是：只要孩子快樂就是了！而且，也要尊重她是個獨立的個體——我們可以提醒她，引發她正向的動機，但萬萬不能一心要改變她！