從唱歌說起

昨天放學後～
女：媽咪，今日老師話我音樂堂無唱歌，其實我有唱啊。
媽：咁你下次唱大聲Ｄ喇！
今天上學時～
媽咪向老師攀談幾句，打探一下孩子近日上課的情況。又要再讚一次，班主任很好，每次與她對談後，媽咪滿有正能量。
師：佢進步咗好多喇，不過佢本身係個感覺好敏銳既人，所以好容易受外界干擾，就會分心。佢係觀察型既小朋友，所以成日掛住睇，太專心睇就唔記得自己要做乜。
媽：我都好同意佢係觀察型，肯定唔係行動型果種！做嘢慢吞吞！
師：但佢好細心，少少嘢都睇得好清楚，成日提我：Ms Chong你跌咗嘢啊！其實佢好體貼。不過，都係要提醒多D，以免佢唔記得咗自己要做乜。
媽：佢尋日音樂堂係咪冇唱歌？
師：係呀，佢有話你知？
媽：係。佢話佢有唱，於是我叫佢唱大聲Ｄ。
師：佢直情個口都冇郁。唱Ｄ舊歌時，佢可能覺得自己識，所以唔唱，到唱新歌時佢又唔唱。有Ｄ小朋友好得意：佢地個心唱就以為自己唱緊。佢唔唱，所以後來我叫佢出黎唱番俾我聽。
放學後，媽咪又向女兒重提她上堂不唱歌的事。
女：Ms Chong話我唔唱，所以叫我出黎唱番俾佢聽，我唔出。
媽：吓？？ 咁跟住點？
女：佢走過黎，細細聲講：老師叫你出黎你就要出黎架喇。
媽：咁你結果有冇出？
女：有。
這個孩子，果然要施以軟功的。