回帶Mｏｄｅ～～
昨夜，媽咪預備入睡了，女兒氣急敗壞地衝入我們房間，訴說著剛才不小心倒瀉了整盒全新（係全新！）的棉花棒。
女：媽咪點算啊？係咪執返入個盒啊？
媽（沒好氣地）：你執返入去啦。
是日早餐時，由爹哋先說起昨晚這事。
爸：做乜廁所有咁多支棉花棒拎咗出黎？
女：我尋晚倒瀉咗。
媽：係喇，你尋晚做乜會倒瀉晒盒棉花棒？
女：我做實驗時拎住個盒，唔知點樣就成隻手反轉咗。
（想像那個畫面，應該頗有喜感吧！）
媽：咁咪污糟晒囉？
女：我有諗過架，我將Ｄ濕咗既執埋一堆，可以用來清潔地方用，其他乾既放返入盒。
雖然心底覺得她某程度已經污染了它們，但還是向她報以一個皮笑肉不笑的樣子，倒亦欣賞這孩子當時稍有思考過才善後。
女：媽咪，如果你細個咁樣，係咪會比婆婆鬧到飛天？
（婆婆啊婆婆，抱歉曾向女兒說過你教養的方式！）
兩代人的教養孩子的方針，都必然是希望他們向好的，但表達方式各異。心底極速思量著該令孩子正向思考她祖輩教育方針的一些積極意義，便說：咁倒瀉咗野係浪費，嚴厲可以令人深刻，下次會謹慎Ｄ嘛。
然後，媽咪古惑地笑問：咁我係咪應該惡Ｄ鬧你呢？！
她不同意道：鬧係嘥氣，唔等於下次唔會再犯。而且都已經發生咗，棉花棒要濕都濕咗，鬧又唔會令件事回轉。
我之前和她說過的類似的話，好傢伙，學以置用！某程度非常同意這說法，畢竟鬧她的確是件嘥氣的事。
近日學校放假，對於有人早晚不斷重複吵鬧，自覺已經身心太累。昨天，我選擇避開，一整天都幾乎沒理啋過這孩子。黃昏時，她報復式似的以更大的哭鬧來回應：你今日做乜咁嬲我？我做錯咗Ｄ乜？你做乜全日都唔理我？係咪唔愛我？
看著她渴望被愛與被肯定的樣子，雖然討厭那種哭鬧，但作為一個理智的成年人，還是以憐憫與愛來回應，便如實告知：我只係需要一Ｄ空間，保持心靈平靜。你覺得我唔愛你咩？我點會唔愛你。
她大惑不解，無法感受媽咪複雜的情感。
 |
| 好端端全新的棉簽，變得亂七八糟 |
較新的文章
