變魔術

黃昏上畫班，臨出門口前，女兒拿著一枝粉藍色原枝筆若有所思，忽然她說些令媽咪有點吃驚的事：上次畫班，XXX(同組的六歲姐姐)拎咗我枝粉紅色lollipop筆放入佢個袋，跟住佢變唔見咗。

同款的粉藍色筆，都是生日會收的小禮物

媽咪追問：吓？佢變唔見咗你技筆？咁之後呢？有冇俾番你？
女兒悻悻然說：枝筆唔見咗喇。
由於趕著外出，媽咪未有再追問。
媽咪對XXX頗有印像，因為上次上堂之前正好和她談了幾句，多口問了她的名字，且知道她快要升小一了。
顯然，這是四歲小女孩被六歲小女孩所騙的故事。媽咪感到吃驚的最大原因是，原來六歲的人仔已經這般鬼靈精！媽咪不會懷疑女兒亂說，因為她講的時間人物和地點都太仔細了，以她的年齡，應該未有能力編造這些合情合理的故事。但她如今口講已無憑，加上事隔一星期，壓根無從追究。其實也不想追究，筆子不值甚麼錢，我們也沒責任／權利／義務去教導人家孩子。
臨上堂前，又遇上XXX。媽咪在女兒耳邊小聲說：要專心上堂，唔好同小朋友玩變魔術喇，變變下唔見晒Ｄ嘢。
電話中跟爹哋略交代了事件，他建議還是要跟導師說一聲，這改變了媽咪原本打算就此作罷的想法。接下課時跟導師簡單訴說了事件，媽咪兩番強調不是要追究，只希望女兒可以專心上堂，請老師協助留意女兒不要只顧住同人玩，而心底沒出的一句是：有個細路存心呃另一個細路。
老師則比較關心筆子的樣式，問得有點仔細，可能想試試在課室內找也說不定。
媽咪心底覺得女兒失了筆子也是她自找的，誰叫她帶那些無謂嘢去上堂。
回家的路上，大手牽著小手，媽咪試圖探聽女兒不見了筆子的心情。
一如所料，這個孩子其實也不是太珍惜自己的東西。
她說：唔緊要啦，我仲有枝粉藍色。
然後，又是媽咪一輪教訓：唔係唔緊要呀，自己Ｄ嘢要好好保管架...(下省數十字)。