中醫調理

今早看中醫，即使預約了，結果都要苦候兩小時。候症室不大，迫滿了十幾廿個男女老幼：遲醫師宅心仁厚，這就是理由了！
把了脈好一回，醫師問：「你最近係咪做過手術？你氣虛體弱....」
「嗯，上星期剛流產。」每次說起，依然傷心，我語帶嗚咽。
「又係呢Ｄ！你呢個年紀，一有咗就要搵中醫幫手安胎架！雖然唔係話年紀好大，都叫做大少少嘛。有輔助會好Ｄ呀。」他憐惜地看著我，很平和地說著。
聽著聽著，好生感觸，我眼圈一紅，淚水便悄悄滑了下來。
再按脈象，他說了一大堆我的體質與狀況，比如：容易壓力大、為人很緊張、腸胃弱又多胃氣；有一些狀況比較大圍的，都是一般都市人有的毛病，但總的都叫準吧。
「唔緊要架，調理好身子先，實有得生喎！我呢度有人四十幾歲都仲生。」他笑笑說。及後再追問：「方唔方便煲中藥？」
「可以，但我唔識煲...」我實在從未煲過藥。
「咁食藥散啦！」，「你先生咁好陪你黎睇我，呵，咁靚仔！」聽得我笑了出來。
「放心喎，佢會同你生個仔！」，他對老公說，我倆相視而笑了。
「呢個天時，唔煲藥仲好啦，宜家最重要係調理好身體，知唔知？」，「著衫都要注意架，要注重保暖，因為你身體好弱...」望了望我的裝束後他指著我的涼鞋說：「鞋你就著錯嘞，要著番對襪嘛！」
未吃藥散，虛弱的身體雖未得著調理，但心靈已得了極大的撫慰。
大夫，謝謝你！