量體溫

是日早上，女兒體溫稍偏高。她昨晚拉肚子，大抵是有點腸胃炎了。這個時勢，只要體溫稍稍偏高，太易令人神經過敏。

午餐前~

媽：點解你今日咁想返學？

女：唔係今日想返，係日日都想返。

媽：但你今日好似特別想返學喎？

女：係因為我今日根本無得返，咁梗係特別想啦！

語畢，二人大笑。沒上學樂也融融？天知道：這個清晨，有人因不能上學而大哭了一場。看著孩子哭哭啼啼，媽咪確實不理解學校到底施了甚麼魔法。不過，喜愛上學絕對是好事吧！

換轉從前，見孩子精神不俗又未去到真正發燒，可能都會考慮由她上學。不過，學校的紅外線體溫儀如天羅地網，一旦回去後體溫再稍上升，如今在疫情下必定會令校方大為緊張，而我們亦得立時接她走。

女兒爭辯道：我都冇發燒！

媽咪沒好氣回應：我隻手都摸到你有少少熱過平時，今朝先會叫你去量體溫。你估我隻手定學校體溫計敏感度高？